生死守恆村（上）
我叫阿輝，我嘅興趣係周圍去旅行，特別係去啲有神秘傳說嘅地方。
大家都知，到處都有人想呃遊客，為免麻煩，我儘量都打扮到窮啲。
呢一次，我去咗「娘娘寨」。
據講，呢條村係楊貴妃嘅後代，當年馬嵬坡下，楊貴妃其實冇死到，遠走他鄉，生下後代，所以名為「娘娘寨」。
呢種傳說冇咩出奇，好多人都會聲稱自己係某個古代名人嘅後代，事隔一千幾百年，唔通驗DNA咩。
真正得意嘅係，呢條村嘅人數係固定嘅，永遠都只有88個村民。
無論係豐收定天災人禍，人數都唔會增加或者減少。
比如有人生咗BB，就會有另一個村民死去，總之，每年過年嘅時候，娘娘寨一定係有88個村民。
傳說，有一年，有一戶人家喺外地娶新抱番嚟，新抱生咗個BB。
但嗰個時候，村裡面冇好老嘅老人家，亦冇重病嘅村民，大家都以為會打破88人嘅規律。
但冇幾耐，接連有兩個後生仔意外身亡。
類似嘅事情層出不窮，總之，加加減減，人數永遠冇改變，所以被稱為「生死守恆村」。
今次，我嚟呢度旅行，當然係想探索吓呢個奧秘。
有同樣諗法嘅人不在少數，所以村裡面都有唔少遊客，只要畀錢，就可以寄宿喺村民屋企。
好彩，遊客嘅打扮比較新潮，同村民有啲唔同。
我夜晚寄宿喺李嬸屋企，日頭周圍行，默默認人同數人頭。
由於我生得又黑又醜，行行吓都會聽到有人笑我：「睇吓，嗰個男人好醜樣。」
呢種事我已經遇得太多，我已經冇咩感覺。
但神奇嘅事，喺第三晚開始發生。
李嬸突然間對我好好，依照我過往經驗，無事獻殷勤，多數係想呃我。
但係，自從我扮到好窮之後，已經冇咩人打我主意。
我喺銀包拎出幾張皺巴巴嘅紙幣，扮到傻仔咁：「我想買嘢食，唔知呢度物價係點，我得咁多錢。」
李嬸推開我隻手，好熱情咁話：「哎呀，阿輝，我哋駛咩講錢。我見你就覺得好親切，好似我個仔咁。」
我更加覺得奇怪，一般嘅騙子，通常見到幾多錢就呃住幾多先，李嬸連送上門嘅錢都唔要，只可以證明佢所圖甚大。
我多番試探，但李嬸冇對我提出任何要求，只係強調佢覺得我好合眼緣，只要我住得開心就得。
跟住落嚟嗰幾日，我喺條村度周圍走，所有村民都對我好熱情。
有遊客笑我醜樣，村民仲義憤填膺地鬧個遊客。
我已經暗暗記低晒村民嘅樣，計過數，依加有87個村民。
按照傳說，明年過年嗰陣，人數就會變番88個。
不過，依加已經十一月，條村亦冇孕婦，即係話，要變番88人，就要靠外地搬入嚟嘅人。
李嬸同村民嘅意圖昭然若揭，佢哋對我咁熱情，係想引誘我連人帶戶籍咁搬入嚟，幫佢哋湊人頭，維持「生死守恆村」嘅傳說。
維持呢個傳說，對佢哋有咩著數？
最重要嘅問題係，如果呢個傳說係村民刻意造假，咁佢哋點樣處置「多出嚟」嘅村民？
我去咗村口，每年過年，所有村民都會聚集，影一張大合照，每張合照都有88人。
佢哋將所有合照擺喺村口，亦係呢條村嘅景點之一。
唔少遊客聚集喺村口，對住合照數人頭，嘖嘖稱奇。
我圍埋去，仔細觀察上一年嘅合照，相中有88個人，比我依加所見多咗一男一女，少咗一個嬰兒。
照咁推斷，今年過年後，有一個嬰兒出世，變成89人。
村民為咗維持傳說，應該減一個人，唔知出咗咩意外，呢對男女消失咗，令呢條村變成87人，所以村民急急腳搵個人嚟補數。
夜晚，我返到李嬸屋企。
我藉故同李嬸講，我嘅旅費都用得七七八八，差唔多要返屋企。
李嬸臉色一變，匆匆忙忙咁出咗去，好快就帶埋村長過嚟。
村長和顏悅色咁同我講：「阿輝，我睇你都幾鍾意呢度，你有冇興趣搬嚟呢條村呢？」
下集：https://bit.ly/3g5Lenl
將專頁設定為「搶先看」/ "See first"，最新故仔馬上睇！
我嘅職業係：屍體Cosplayer：https://goo.gl/xeBv1R
我被我綁架：http://bit.do/e2qYk
#短故 #短篇 #小說 #陳美濤 #廣東話 #粵語 #tomatochan #生死守恆村
Search